الى متى ؟ ... بقلم / حامد فوزى ،،،

الى متى ... ؟؟؟

الى متى سنظل صامتون عاجزون حتى عن ابداء آرائنا ؟ مسجونون داخل سلبيتنا محاصرون بتبلدنا مكبلون بقانون الطوارئ و امن الدوله والامن العام والمخابرات والى ورا الشمس ، هل سنكون فى يوم من الايام نحن ام سنصبح ناس اخرون ؟ مصنوعون صامتون ، هل سنحقق ولو جزء بسيط من طموحاتنا ؟ ام سنرى على ارض الواقع مشروعاتهم هل سنرى يوما حلولا لمشاكل جيل كامل بل دوله كامله ؟ ام سنرى عالمهم الوردى المنتظر .

عندما تعيش فى هذا العالم - الذى اتحدث عنه - تحمد الله انك لسه عايش ولست داخل كرش احد القروش ولكن مهما كان القرش قوى مسيطر حاكم متسلط رئيس ، فاعلم ان ثورة الاسماك ليست هينه بسيطه ، ولكن السؤال الاهم هو متى هذه الثوره ؟ الى اى حد ننتظر ان تصل الامور حتى تتحقق الانتفاضه ماذا ننتظر ان يحدث اكثر مما نحن فيه ، ماذا ننتظر ؟؟؟

- يا عم كل فتافيتك احسن ،يا سمكه ربى عيالك ، جحرك وعيالك عايزينك ، وبنطاطى .
- تسمع عن مظاهره احتجاج مسيره ندوه جمعيه ...... يا عم انا مالى يعنى هما مستنينى .
- تحلم بهوا نضيف ومواصلات فاضيه وطرق واسعه ورخاء اقتصادى ... تصحى من النوم تقول خير الله ما اجعله خير وتستعيذ .

وكأن السيئ هو الاصل والخطأ المبدأ والسلبية شعار الجميع ، والى فوق فوق على طول ، والى تحت يلعن ابو الى فوق ، والكبير قاعد ومبلط فى الكرسى من 30سنه - باين - وناوى يقعد ابنه آل يعنى هى ناقصه ومشبعناش من الكبير ، ما ننكرش ان فى حاجات كتير حلوه ومفيده بس النسبه لا تذكر .

يا ترى لسه فى ناس بتحلم بمصر احسن وحياه اكرم وبديموقراطيه وشفافيه من الاصلى - مش المصرى - ولا خلاص بقى امر واقع ، الحكومه من دول تتشكل وترسم خطط وتصدر تصريحات وبيانات و وعود للشعب الغلبان وسنه فى التانيه تتغير الحكومه وتيجى التانيه وكأنها تسير على نفس الخطى حتى تتغير الحكومه وهكذا ومن حكومه لحكومه يا قلبى لا تحزن - الا قليلا - ، نفسنا فى حكومه هدفها راحة الناس ومصالحهم تخاف على حقوق المواطنين وقانون يجيب للمظلوم حقه حتى لو مجريش وراه وتجيب للظالم نقطه ، نفسنا نشم هوا نضيف زهقنا من تصريحات نظيف الى تمن الورق الى مكتوبه عليه اغلى من التصريحات والوعود نفسها .

نفسنا بتغيير ولو بسيط بس على الاقل نحس بيه نفسنا الريس ينزل يمشى فى الشارع يحضر مباريات مسرحيات يجرب يشترى عيش يركب مواصله عامه ، ينزل من برجه العالى المكيف يجرب الحر والزحمه والدوشه ، يجرب يشرب ميه من الحنفيه ياكل فى مطعم بسيط يعمل اى حاجه من دول من غير جيش الحراسه المرافق ليه - او بيه - .

والله لو جت اللحظه الى فيها الريس يعمل فيها اى حاجه من دول بطبيعيه وتلقائيه ، اعرف ان الريس ده يستاهل انه يحكمنا ، يستاهل نروح الانتخابات نديله اصواتنا ، ونهديه مصيرنا وقلوبنا .

ربنا يخليك لينا يا ريس ، ويكون فى عونك علينا ، عارف ان المسؤليه كبيره بس عارف برده انك قدها وقدود ، ربنا يطولنا فى عمرك .

حامد فوزى ،،،

والنبى ابقو اسالو عليا بعد ما تقرو الكلام ده .

وان شاء الله لو حصل حاجة هنبقي نجيلك بالعيش والحلاوة
************
مهو ده العشم برده

ولو انى مبحبش الحلاوه غير فى المناسبات

اتمنى تبقى جبنه مثلثات

وبطانيه لحسن الجو بيبرد بالليل

اما عن السجاير وكارت الشحن فا هابقى اتصرف انا فيهم

شكرا على شعورك النيبل يا اختى

مش عارف من غيركو كان مين الى ها يقف فى الطابور ويجبلى عيش
انت عارفه طابور العيش الى مبيتحركش ده
هوه ده
جربو وانزلو اقفو فيه

ويمكن بعدها تشرفو جمبى لو حد قال العيش وحش ولا مش مطابق لمواصفات وزارة الصحه و وزارة التموين

ويجعله عامر

حامد فوزى ،،،